Kremlniñ spikeri Dmitriy Peskovnıñ Ukrayınanıñ dört vilâyetini işğal etmek niyeti aqqında aytqanları, büyük ihtimalnen, Ğarpnıñ muzakere başlatmaq istegini qullanmaq içün seslendirilgendir, dep tüşüne Amerika Cenkni tedqiq etüv institutınıñ talilcileri (ISW).
«Kreml spikeri Dmitriy Peskovnıñ Moskvanıñ şimdiki topraq maqsadı Ukrayınanıñ qısmen işğal etilgen dört vilâyetini zapt etmek olğanını aydılatqanına baqmadan, Ukrayınadaki maqsadlarından Kreml vazgeçmedi. Dekabrniñ 8-nde Peskov Rusiye prezidenti Vladimir Putinniñ dekabrniñ 7-nde «yañı Rusiye topraqlarını» zapt etüv izaatlarını kenişletip, Ğarpnıñ muzakere keçirmek istegi imkânından faydalandı», – dep aytıla esabatta.
Böylece, ISW hulâsalarına köre, Kremlniñ istekleri deñişmedi, Peskovnıñ izaatları ise olardan çıqmay.
Esabat müellifleriniñ fikirince, Moskvanıñ beyanatları «Ğarpnıñ başını aylandırıp, Kyivni muzakerege ve uzlaşuvğa qandırmağa mecbur etecek daimiy informatsion operatsiyanıñ» bir qısmı ola.
Kremlniñ matbuat kâtibi Dmitriy Peskov dekabrniñ 8-nde bildirgenine köre, şimdi Ukrayınağa qarşı cenkte yañı topraqlarnıñ Rusiyege qoşuluvı aqqında «laf ketmey».
2022 senesi fevralniñ 24-nde Rusiye Ukrayınağa büyük istilâ etti. 2014 senesinden berli Donbasnıñ bir qısmı ve Qırım onıñ işğali altında buluna. Sentâbr ayında Rusiye Zaporijjâ ve Herson vilâyetlerinen beraber dört Ukrayına vilâyetiniñ işğali aqqında ilân etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
