Rusiye prezidenti Vladimir Putinniñ matbuat kâtibi Dmitriy Peskov hususan Qırım işğali sebebinden Rusiyege qarşı sanktsion basqını quvetleştirmege çağırğan Avropa parlamentiniñ Rusiye qararını tefsir etti.
«Bu vesiqa tek yazıqsınuvnıñ sebebi ola bile. Ne yazıq ki, anda dialog qurulmalı, dep aytılmay, meseleler ve zıddiyetler farqlı seviyelerde ve farqlı kanallarda çezilmeli, dep aytılmay. Tek bir şey bar, bu vesiqa tevsiye olaraq qullanıla bile», – dep bildire Peskovnıñ aytqanlarını TASS agentligi.
Qararğa 494 Avropa deputatı rey berdi, 103 – qarşı çıqtı, daa 72 – bitaraf qaldı.
Avropa parlamenti aydınlatqan malümatta esas maddeler mevcut. Avropa Birligi içün em Avropa Birliginde, em onıñ tışında eñ esası «azatlıq, istiqrarlıq ve barışıq» ola, dep aytıla. Qararda «Rusiye akimiyetiniñ tecavuzcı siyaseti» bu qıymetler içün telükeli ola, dep qayd etile, Qırım işğali, Ukraina, Gürcistan ve Moldova topraq bütünliginiñ bozuluvı örnek olaraq kösterile.
Ukraina Tış işler naziri Dmıtro Kuleba sentâbrniñ 16-nda keçirilgen brifingde bu qararnı «sert» dep adlandırdı ve Ukraina tarafı «memnün qaldı», dep bildirdi.
Mayısta haber etilgenine köre, Avropa parlamentinde Rusiye ile munasebetler strategiyasınıñ tevsiye leyhası azırlanıldı.
Avropa parlamentiniñ vesiqaları tevsiye olaraq qabul etile. Deputatlar Moskvağa qarşı bayağı sert siyaset çağıruvlarınen bir sıra qararnı qabul etken edi, amma Avropa komissiyası ve onıñ memleketleri – AB azaları bir çoq tevsiyeden faydalanmadı. Aynı vaqıtta Avropa komissiyası Rusiye AB ile yüzleşüv yoluna çıqtı, dep bildire, ve Moskva ile yañı munasebet strategiyası olmalı, dep aytıla.
Rusiye Avropa parlamentniñ reisi David Sassolige qarşı sanktsiyalar aqqında ilân etti.
Rusiye 2014 senesi Qırımnı işğal etti, soñra Ukraina, ABD ve Avropa Birligi er yıl uzatılğan iqtisadiy sanktsiyalarını kirsetti. 2021 senesi Ukraina akimiyeti yarımada işğaliniñ toqtatılması içün halqara meydançıq olacaq «Qırım platforması» quruluvınıñ teşebbüsçisi oldı.
