Avropa parlamenti Rusiye ile munasebetler qararını tasdıqlap, hususan Qırım işğali sebebinden sanktsion basqını quvetleştirmege çağırdı. Ukraina Tış işler naziri Dmıtro Kuleba sentâbrniñ 16-nda keçirilgen brifingde bu qararnı «sert» dep adlandırdı ve Ukraina tarafı «memnün qaldı», dep bildirdi.
Qararğa 494 Avropa deputatı rey berdi, 103 – qarşı çıqtı, daa 72 – bitaraf qaldı.
Avropa parlamenti aydınlatqan malümatta esas maddeler mevcut. Avropa Birligi içün em Avropa Birliginde, em onıñ tışında eñ esası «azatlıq, istiqrarlıq ve barışıq» ola, dep aytıla. Qararda «Rusiye akimiyetiniñ tecavuzcı siyaseti» bu qıymetler içün telükeli ola, dep qayd etile, Qırım işğali, Ukraina, Gürcistan ve Moldova topraq bütünliginiñ bozuluvı örnek olaraq kösterile.
Avropa parlamenti, Vladimir Putin akimiyette qalğan vaqıt devamında AB memleketleriniñ Rusiye gazı, cermayı ve diger maddelerden energetik bağını eksiltmege tevsiye ete.
Qararda qayd etilgenine köre, AB «Rusiye akimiyeti, Rusiye oligarhları, prezident Putinniñ ortaqları ve qorantalarınıñ azalarına qarşı insan aqları bozulğanı içün sanktsiyalarnı kirsetüv imkânlarını quvetleştirmeli».
«Bizim içün müim olğan şey vesiqanıñ normal işbirligine qaytmaq imkânsız olğanını qayd etmesidir, business as usual degen şey, Rusiye tecavuzcı siyasetini ve Avropa Birligine, Ukraina ait olğan Şarqiy ortaqlıq memleketlerine qarşı gibrid cenkini toqtatmalı, Gürcistan, Moldova ve Ukrainanıñ topraq bütünligi halqara seviyede tanılğan sıñırlarda ğayrıdan tiklenmeli», – dep qayd etti brifingde Kuleba.
Rusiye, Avropa parlamentiniñ qararını daa tefsir etmedi.
Mayısta haber etilgenine köre, Avropa parlamentinde Rusiye ile munasebetler strategiyasınıñ tevsiye leyhası azırlanıldı.
Avropa parlamentiniñ vesiqaları tevsiye olaraq qabul etile. Deputatlar Moskvağa qarşı bayağı sert siyaset çağıruvlarınen bir sıra qararnı qabul etken edi, amma Avropa komissiyası ve onıñ memleketleri – AB azaları bir çoq tevsiyeden faydalanmadı. Aynı vaqıtta Avropa komissiyası Rusiye AB ile yüzleşüv yoluna çıqtı, dep bildire, ve Moskva ile yañı munasebet strategiyası olmalı, dep aytıla.
Rusiye Avropa parlamentniñ reisi David Sassolige qarşı sanktsiyalar aqqında ilân etti.
Rusiye 2014 senesi Qırımnı işğal etti, soñra Ukraina, ABD ve Avropa Birligi er yıl uzatılğan iqtisadiy sanktsiyalarını kirsetti. 2021 senesi Ukraina akimiyeti yarımada işğaliniñ toqtatılması içün halqara meydançıq olacaq «Qırım platforması» quruluvınıñ teşebbüsçisi oldı.
