«Krımenergo» müessisesi, 2015 senesi Herson vilâyetinde elektrik naqil hatlarınıñ patlatıluvı neticesinde blackouttan körgen müessise zararı 1 mlrd rubleden çoq oldı, dep bildirdi. Rusiye tahqiqatçıları elektrik naqil hatlarınıñ patlatılmasında ATR telekanalınıñ saibi Lenur İslâmovnı qabaatlay. Zarar miqdarı Qırım.Aqiqatnıñ elinde olğan dava malümatlarında mevcut.
«Krımenergodan» ğayrı, bu dava çerçivesinde Qırımdaki Rusiye Fevqulâde vaziyetler nazirliginiñ idaresi (zarar miqdarı 40849426 ruble), Rusiye kontrolindeki Qırım sağlıq nazirligi (zarar miqdarı 5885590 ruble), Rusiye Qara deñiz flotu (217810,98 ruble) ve daa bir sıra müessise zarar körgenini bildirdi.
İslâmovnıñ advokatı Aleksey Ladinniñ Facebookta yazğanına köre, «bu onıñ tecribesinde 1 mlrd rubleden çoq olğan ilk davadır».
«Lenur İslâmovnıñ qabaatını aytmaq içün «Krımenergo» alamağan elektrik energiyasından körgen zararını başta isbatlamaq kerek. Bu zarar farqtan kele: qırımlılardan kelgen paradan ve «Krımenergonıñ» tölegen parasından, esasen – «Ukraina yaqarlıq şirketine» – «Ukrintkrenergoğa». Elbette, vastacı yardımınen – «TSOR» şirketi üzerinden. Amma zarar isbatlarını «Krımenergo» mahkemege köstermedi. «Krımenergo» almağan elektrik energiyasınıñ aparsını tölemedi, amma milliard almağa istey», – dep izaatladı o.
«Krımenergo» müessisesiniñ İslâmovğa qarşı milliardlıq davası aqqında malümatnı Rusiye kontrolindeki Qırım Yuqarı mahkemesi «İnterfaks» agentligine tasdıqladı.
Rusiye kontrolindeki Qırım Yuqarı mahkemesi ATR qırımtatar telekanalınıñ saibi ve 2015 senesi Qırımnıñ vatandaş qamaçavınıñ faal iştirakçilerinden biri Lenur İslâmovğa qarşı davanı temelden baqıp başladı. Mayısnıñ 25-nde onı qabaatladılar.
İslâmovnıñ Qırım.Aqiqatqa bildirgenine köre, o, Rusiye kontrolindeki Qırım Yuqarı mahkemesiniñ oturışuvlarında şahsen iştirak etmeycek. Qırımda oña qarşı esnasnı adaletsiz cezalav dep adlandırdı.
2015 senesi oktâbr ayında Rusiye FSBsi Lenur İslâmovğa dava açıp, onı federal qıdıruvğa ilân etti.
2015 senesi dekabr ayında Rusiye kontrolindeki Qırım mahkemesi İslâmovnıñ yarımadadaki mal-mülkini tevqif etti. Dekabrniñ 21-nde Qırımnıñ Rusiye prokurorı olğan Natalya Poklonskaya İslâmov ğıyabiy şekilde diversiyalarda qabaatlandı, dep bildirdi. İslâmov bu qararlarnı qanunsız dep adlandırdı.
Oña ait ATR telekanalı 2015 senesi aprelniñ 1-nden başlap işğal altındaki Qırımda yayınlarını toqtattı. Telekanal Kyivge köçip, 2015 senesi iyünniñ 17-nde yayınlarını yañıdan başlattı.
