ATR qırımtatar telekanalınıñ saibi Lenur İslâmov oña qarşı açılğan cinaiy dava baqılğan Rusiye kontrolindeki Qırım Yuqarı mahkemesiniñ oturışuvlarında şahsen iştirak etmeycek. Bu aqta İslâmov Qırım.Aqiqatqa bildirdi.
«Qırımnı qurtarmağa kelgende ve Qırımnı zapt etken satqınlar mahküm etilgende iştirak etecem. Şimdi ise mahkeme degil, adaletsiz cezalav yapıla. Bundan evel qayda ediler ve dava ketişatını ne içün derc etmediler, bir tedbir aqqında bile haber etmediler?! Anda advokatımnı yollarım, belki, çünki qırımtatarlar üzerindeki adaletsiz cezalavda iştirak etkenlerni bilmege isteyim. Bu soyadları, ümüt etem ki, Qırım prokuraturası açacaq davalar içün aqlımızda qalmalı. Kelecek nesiller de olarnı bilmeli», – dedi İslâmov.
Rusiye kontrolindeki Qırım Yuqarı mahkemesiniñ qadılar kollegiyası ATR qırımtatar telekanalınıñ saibi Lenur İslâmovğa qarşı açılğan davanı baqıp başladı. Qayd etilgenine köre, İslâmov «qanunsız silâlı birleşmeni qurğanında, diversion areketler yapqanında ve Rusiye Ceza kodeksiniñ 280-inci maddesiniñ 6 levhasına istinaden – «Ekstremist faaliyetini kerçekleştirmege açıq şekilde çağırğanında» qabaatlana.
Daa evel Qırımda qurucısı Lenur İslâmov sayılğan «Noman Çelebicihan göñülli batalyonı» silâlı birleşmesiniñ azaları olğanı içün qabaatlı tanılğan qırımtatarlarına qarşı 3 qabaatlayıcı üküm çıqarıldı. Bu birleşmeniñ azaları olğanından şübheli sayılğan daa eki qırımlığa ğıyabiy üküm çıqarıldı.
2015 senesi oktâbr ayında Rusiye FSBsi Lenur İslâmovğa dava açıp, onı federal qıdıruvğa ilân etti.
2015 senesi dekabr ayında Rusiye kontrolindeki Qırım mahkemesi İslâmovnıñ yarımadadaki mal-mülkini tevqif etti. Dekabrniñ 21-nde Qırımnıñ Rusiye prokurorı olğan Natalya Poklonskaya İslâmov ğıyabiy şekilde diversiyalarda qabaatlandı, dep bildirdi. İslâmov bu qararlarnı qanunsız dep adlandırdı.
Oña ait ATR telekanalı 2015 senesi aprelniñ 1-nden başlap işğal altındaki Qırımda yayınlarını toqtattı. Telekanal Kyivge köçip, 2015 senesi iyünniñ 17-nde yayınlarını yañıdan başlattı.
