Rusiye kontrolindeki Qırım Yuqarı mahkemesiniñ qadılar kollegiyası ATR qırımtatar telekanalınıñ saibi Lenur İslâmovğa qarşı açılğan davanı baqıp başladı, dep haber ete «Qırım esnası» haber resursı.
Qayd etilgenine köre, İslâmov «qanunsız silâlı birleşmeni qurğanında, diversion areketler yapqanında ve Rusiye Ceza kodeksiniñ 280-inci maddesiniñ 6 levhasına istinaden – «Ekstremist faaliyetini kerçekleştirmege açıq şekilde çağırğanında» qabaatlana.
Berilgen malümatqa köre, Qırımda koronavirus sebebinden mayısnıñ 31-ne qadar ilân etilgen «yüksek seviyeli azırlıq» rejimi vaqtında mahkeme vekilleri bu davanıñ ilk oturışuvına diñleyicilerni kirsetmedi. Neşir bu esnasnıñ imaye tarafından izaat alıp olamadı.
Qırım.Aqiqat, Lenur İslâmovnıñ işğal etilgen Qırımda oña qarşı başlatılğan esnasnen bağlı fikirlerini bilmege tırışa.
Daa evel Qırımda qurucısı Lenur İslâmov sayılğan «Noman Çelebicihan göñülli batalyonı» silâlı birleşmesiniñ azaları olğanı içün qabaatlı tanılğan qırımtatarlarına qarşı 3 qabaatlayıcı üküm çıqarıldı. Bu birleşmeniñ azaları olğanından şübheli sayılğan daa eki qırımlığa ğıyabiy üküm çıqarıldı.
2015 senesi oktâbr ayında Rusiye FSBsi Lenur İslâmovğa dava açıp, onı federal qıdıruvğa ilân etti.
2015 senesi dekabr ayında Rusiye kontrolindeki Qırım mahkemesi İslâmovnıñ yarımadadaki mal-mülkini tevqif etti. Dekabrniñ 21-nde Qırımnıñ Rusiye prokurorı olğan Natalya Poklonskaya İslâmov ğıyabiy şekilde diversiyalarda qabaatlandı, dep bildirdi. İslâmov bu qararlarnı qanunsız dep adlandırdı.
Oña ait ATR telekanalı 2015 senesi aprelniñ 1-nden başlap işğal altındaki Qırımda yayınlarını toqtattı. Telekanal Kyivge köçip, 2015 senesi iyünniñ 17-nde yayınlarını yañıdan başlattı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
