Avropa yengil atletika birleşmesi yengil atletika boyunca Avropa çempionatını lâğu etti. Yarış avgustnıñ 25-26-sında Parijde keçecek edi, bildire Azatlıq Radiosı.
"Avropa yengil atletika birleşmesi, Frenkistan yengil atletika birleşmesiniñ tibbiy komissiyasınıñ seyirciler ve resmiy şahıslar içün iltimallı telüke aqqında fikrine esaslanıp, yarışnı lâğu etti", - denile beyanatta.
Koronavirus pandemiyasından sebep bütün dünyada sport yarışlarını lâğu eteler.
Daa evel, Ekinci cian cenkinden soñ ilk sefer Wimbledon turnirini lâğu ettiler.
Aprelniñ 24-ünde saba dünyada 190 788 adam koronavirustan öldi. 2,7 milliondan ziyade adam COVID-19-nen hastalandı, 4,6 milliondan ziyade adam yahşı oldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
