Qırımnıñ Rusiye sağlıq naziri İgor Çemodanovnıñ bildirgenine köre, aprelniñ 7-nde Qırımda 2900 insan tibbiy közetüv altında buluna, 61 insan hastahanede, 22 kişi observatorda qala.
Bu aqta o, aprelniñ 7-nde Qırımda koronavirus yuqunçınıñ tarqaluvına qarşı tedbirler meseleleri operativ ştabınıñ toplaşuvında ayttı.
«2900 insan tibbiy közetüv altında buluna, 88 insan közetüvden çıqarıldı. 2817 insan dinamik közetüvde qala. 61 insan – hastahanede, 5 kişi çıqarıldı, bir kişi ketirildi. Tünevin saat 18-de 22 insan observatorda edi. 21 koronavirus hastasından 16-sı hastahanede tedaviylene. Ağır hastalar yoq», – dep ayttı Çemodanov.
Onıñ bildirgenine köre, bugün akimiyet Yalta observatorını çalıştırmağa planlaştıra.
Qırımda aprelniñ 7-nde daa bir koronavirus hastası qayd etildi.
Aprelniñ 6-nda qayd etilgen yañı koronavirus hastası aqqında haber etildi, aman-aman üç biñ insan tibbiy közetüv altında buluna, beş kişi hastahaneden çıqarıldı. Aqyarnıñ Rusiye akimiyeti, şeerde yañı hastalar yoq, amma 1340 insan yaşağan yerinde közetüv altında buluna, dep bildirdi.
Koronavirus yuqunçınıñ tarqaluvına yol bermemek içün işğal etilgen Qırımda ve Aqyarda «yüksek seviyeli azırlıq» rejimi kirsetildi.
Qırımda özüni tecrit etüv rejimi aprelniñ 30-na qadar, Aqyarda ise aprelniñ 12-ne qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
