Qırımda ilk tasdıqlanğan koronavirus hastasınıñ alına orta ağır olaraq qıymet kesildi. O, kerekli tedaviylev köre, dep bildire Rusiye kontrolindeki Qırım Sağlıq nazirliginiñ matbuat hızmeti.
«Frenkistandan Kelgen hasta keskin nefes virus yuqunçı alâmetlerinen yuqunç telükesizligi tedbirlerine riayet etilip, tibbiy müessisege ayrı boksqa alındı. Koronavirus yuqunçı tasdıqlanmazdan evel de karantinde edi. Al-azırda kerekli tedaviylev köre», – dedi Kreml kontrolindeki Qırım sağlıq naziri İgor Çemodanov.
Berilgen malümatqa köre, hasta «orta ağır alda buluna, sıcağı köterilmey».
Matbuat hızmetiniñ bildirgenine köre, bu hastanen alâqada olğan er kes tibbiy nezaret altında izolâtsiyada buluna.
Hatırlatamız, Qırımda ve Aqyarda 417 insan koronavirus şübhesinen tibbiy nezaret altında qala.
Qırımda ilk koronavirus hastası bar dep tasdıqladılar.
Martnıñ 19-nda Qırımdaki Rospotrebnadzor idaresi, yarımadanıñ tibbiy müessiselerinde «telükeli memleketlerden keskin virus yuqunçı alâmetlerinen» 18 insan buluna, dep bildirgen edi.
Qırımda koronavirus şübhesi ile evde nezaret altında bulunğan insanlarnıñ sayısı arttı. Qırımnıñ Rusiye sağlıq naziri İgor Çemodanovnıñ malümatına köre, ekimler 286 insannıñ alını kontrol ete, 22 insan hastahanelerde buluna.
Aqyarda martnıñ 21-nde 11 hasta infektsion hastahanede tibbiy nezaret altında buluna, 123 insan evde nezaret altında qala.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
