Qırımnıñ Rusiye yolbaşçısı Sergey Aksenov, koronavirus pandemiyası sebebinden yarımadağa memuriy sıñırdan kimler alınacağını tarif etti.
Bu aqta o, martnıñ 22-nde koronavirus qırğınlığınıñ tarqalmaması boyunca operativ ştab toplaşuvında bildirdi.
«Bütün Rusiye vatandaşları ve oturuv izni olğanlar sıñırdan kirsetile. Bir problem yoq. Amma er kes Ukrainanıñ qırğınlıq vaziyetini bilmeli. 14 kün devamında istekli karantin olmalı – özüni tecrit etecekler», – dep qayd etti Aksenov.
Al-azırda Ukraina müessiseleri bu malümatqa cevap bermedi.
Aksenov, cemaat naqliyatı aydavcılarınıñ tibbiy maska qullanuvını kontrol etmege emir etti, dep bildire Qırımnıñ Rusiye ükümetiniñ matbuat hızmeti.
Qırımdaki Rospotrebnadzor idaresiniñ yolbaşçısı Natalya Penkovskayanıñ bildirgenine köre, koronavirusnen hastalanğan qırımlı Qırım ve Herson vilâyetiniñ memuriy sıñırındaki Rusiye keçiş noqtasından keçkende Frenkistanğa barğanını gizledi.
Berilgen malümatqa köre, Qırımda koronavirus hastasınen alâqada olğan bütün insanlar ve onı alıp ketken taksi aydavcısı belli ve tecrit etildi.
Martnıñ 21-nde bildirilgenine köre, Qırımda ve Aqyarda 417 insan koronavirus sebebinden tibbiy nezaret altında qala.
Qırımda ilk koronavirus hastası bar dep tasdıqladılar.
Martnıñ 19-nda Qırımdaki Rospotrebnadzor idaresi, yarımadanıñ tibbiy müessiselerinde «telükeli memleketlerden keskin virus yuqunçı alâmetlerinen» 18 insan buluna, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
