Qırımda koronavirus sebebinden hastahanede tedaviylengen 28 hasta ağır alda buluna, 25 hasta reanimatsiyada yata, yedisi aqcigerni suniy avalandıruv cihazına bağlı qala.
Bu aqta Rusiye kontrolindeki Qırım sağlıq naziri İgor Çemodanov sentâbrniñ 23-nde yuqunç ile küreş operativ ştabınıñ toplaşuvında ayttı.
Onıñ malümatına köre, Qırımda koronavirus hastalarını tedaviylemek içün 234 qoşma yer azırlamağa planlaştırıla. 96 insan observatorlarda közetile.
Qırım ve Aqyardaki Rospotrebnadzor idaresiniñ yolbaşçısı Natalya Penkovskayanıñ bildirgenine köre, Qırımda koronavirus hastalarınıñ sayısı artmağa devam ete.
Keçken künü Qırımda 83 koronavirus hastası qayd etildi. Umumen Qırımda 3972 yañı koronavirus hastası qayd etildi, 2526 insan tüzeldi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
