İlhaq etilgen Qırımda koronavis yuqmasında şübelengen 130-dan ziyade adam nezaret altında buluna, bildire Rospotrebnadzornıñ Qırım ve Rusiye boyunca idaresiniñ matbuat hızmeti.
Müessise malümatına köre, er kesni evde baqalar.
"Hastalanğan adamlarnen bağda olğan ya da hastalıq yayılğan memleketlerni ziyaret etken adamlarnıñ nezareti yapıla. 2020 senesi martnıñ 16-sına qadar 132 adam evde tibbiy baqıluv altında buluna, olarnıñ laboratoriya baqıluvınıñ keçireler", - denile beyanatta.
Rusiye martnıñ 18-nden mayısnıñ 1-ne qadar çetel vatandaşları ve vatandaşlıqsız şahıslarnıñ kirişini yasaqladı.
Aqyarda koronavirus sebebi ile mektepler qapatılacağını ilân ettiler.
Keçken künü dünyada 13 903 yañı koronavirus hastası qayd etildi, dep bildire Dünya sağlıq teşkilâtı. Böylece, Dünya sağlıq teşkilâtınıñ versiyasına köre, dünyada koronavirus pandemiyası başlağanından berli hastalarnıñ sayısı 167 511 insan oldı.
