Kreml kontrolindeki Qırım ve Aqyar musulmanları diniy idaresi (QAMDİ), koronavirus tarqaluv telükesi bar olğanından yarımada camilerinde cemaat namazlarınıñ qılınuvı üç aftağa toqtatıla, dep bildire.
Bu malümat QAMDİ saytında derc etildi.
«2020 senesi aprelniñ 12-ne qadar Qırım camilerinde cuma ve cemaat namazlarınıñ qılınuvı toqtatılacaq, er angi maarifçilik ve tasil tedbirleri keçirilmeycek. Bundan ğayrı, 2020 senesi aprelniñ 12-ne qadar Qırım müftisiniñ emrinen dua, ad qoyuv ve nikâh merasimleriniñ keçirilüvi toqtatıla. Cenazeler mümkün olğanı qadar qısqa olmalı, bütün telükesizlik qaidelerinen, quçaqlaşmayıp ve qol tutuşmayıp keçirilmeli», – dep aytıla haberde.
Qayd etilgenine köre, aprelniñ 12-ne qadar Hacı İhsan Qalay yüksek islâm ilimleri medresesiniñ de işi toqtatıla.
«İmamlarğa müminlerni cemaat iştirak etken mezkür ve diger tedbirlerde iştirak etmemelerine çağırmağa ve hastalıqnıñ profilaktika tedbirlerini añlatmağa tevsiye etile», – dep qayd etile haberde.
Aqyar ibadethanelerinde şeerde koronavirus tarqaluvına qarşı dua etildi.
Rusiye pravoslav kilsesiniñ sinodı ibadetler vaqtında areket qaidelerini, ikona ve haçlarnı sanitar işlev hususiyetlerini, tevsiye etilgen yuqunçsızlaştıruv maddeleriniñ cedvelini yolladı.
Qırımda ilk koronavirus hastası bar dep tasdıqladılar.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
