Qırımda keçken künü 552 yañı koronavirus hastaları qayd etildi, tünevin qayd etilgen hasta sayısından (544 hasta) çoq oldı. Bu yarımadada bir künde qayd etilgen yañı rekord oldı.
«2021 senesi oktâbrniñ 14-ne qadar Qırım Cumhuriyetinde 85 913 yañı COVID-19 koronavirus hastası qayd etildi. Soñki künde 552 hasta, bir kün evelsi 544 hasta qayd etildi», – dep bildirdi Kreml kontrolindeki Qırımnıñ emek ve içtimaiy qoruv naziri, baş nazir muavini Yelena Romanovskayanıñ matbuat muavini, dep yaza akimiyetke qoltutqan Qırım kütleviy haber vastaları.
Qayd etilgenine köre, Aqmescitte eñ çoq hasta qayd etildi. Yaltada – 67 hasta, Aluştada – 46, Kefede – 45, Bağçasaray rayonında – 39 hasta qayd etildi.
Berilgen malümatqa köre, yarımadada 15 koronavirus hastası vefat etti, 31 yaşından 60 yaşına qadar üç kişi vefat etti, qalğanları – 60 yaş büyük. 3 898 insan hastahanede tedaviylene, 147-si çağına yetmegen soyu, 86 insan – 19 yaşından 30 yaşına qadar, 1448 kişi – 31 yaşından 60 yaşına qadar. Hastalarnıñ çoqusı 60 yaştan büyük – 2217 insan.
Oktâbrniñ 12-nde Qırımnıñ Rusiye sağlıq nazirligi yarımadada bir künde yañı rekord aqqında bildirdi – 531 hasta qayd etildi. Akimiyet, COVID-19 ve pnevmoniya hastaları içün qoşma 115 yer açıldı, dep bildirdi – al-azırda 4 biñden çoq yer bar.
Qırımda koronavirus pandemiyası sebebinden kirsetilgen yüksek seviyeli azırlıq rejimi dekabr ayına qadar uzatıldı. Oktâbrniñ 11-nde Qırımda yañı koronavirus sıñırlavları işke tüşürildi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
