Qırımda yarımada hastahanelerinde koronavirus hastaları içün yerlerniñ 88%-ı tolu, tibbiy müessiseler qoşma yerlerni aça.
Bu aqta Moskva kontrolindeki baş nazir muavini – Qırımnıñ emek ve içtimaiy qoruv naziri Yelena Romanovskayanıñ matbuat hızmetine esaslanıp Qırım ve Rusiye kütleviy haber vastaları bildire.
«Yerlerniñ 88,4%-ı tolu, oktâbrniñ 14-ne qadar 31 tibbiy teşkilâtta daa 4 410 yer açılacaq. 4 229-ı büyükler, 181-i balalar içün», – dep aytıla haberde.
Qırımda keçken künü 552 yañı koronavirus hastası qayd etildi, tünevin hasta sayısı (544 hasta) daa az edi. Bu yarımadada bir künde qayd etilgen yañı rekord oldı.
Akimiyet, Qırımda COVID-19 ve pnevmoniya hastaları içün 115 yer açıldı, dep bildirdi – al-azırda 4 biñden çoq yer bar.
Qırımda koronavirus pandemiyası sebebinden kirsetilgen yüksek seviyeli azırlıq rejimi dekabr ayına qadar uzatıldı. Oktâbrniñ 11-nde Qırımda yañı koronavirus sıñırlavları işke tüşürildi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
