Qırımda koronavirus hastaları içün yerlerniñ 94%-ı tolu, dep bildirdi oktâbrniñ 8-nde «Krım 24» telekanalınıñ yayınında Qırımnıñ Rusiye ükümetiniñ baş nazir muavini Yelena Romanovskaya. Onıñ aytqanına köre, bölüklerde boş yerler kün-künden eksile.
«Tünevin yerlerniñ 8%-ı boş olsa, bugün 6%-ı boş, em de gece daa 40 qoşma yer açtıq. Bugün reanimatsiya yerlerini de açacaqmız», – dep tarif etti telekanalğa Romanovskaya.
«Krıminform» saytı Qırımnıñ Rusiye sağlıq nazirliginiñ malümatına esaslanıp haber etkenine köre, oktâbrniñ 7-nde Qırımda koronavirus hastaları içün 3859 yer açıldı.
Berilgen malümatqa köre, kövid gospitalleri olaraq çalışqan Aqmescit hastahaneleri tolıp taşa – «acele yardımnen» ketirilgen hastalar Qırımnıñ diger regionlarındaki tibbiy müessiselerge yollanıla.
Neşirniñ haber etkenine köre, Aqmescitteki Cumhuriyet bala yuqunç hastahanesi de koronavirusqa oğrağan kiçik balalar tolu.
Daa evel berilgen malümatqa köre, keçken künü 472 yañı koronavirus hastası qayd etildi, pandemiya başlağanından berli bu raqam rekord oldı.
Hatırlatamız, altı künden berli bir künde qayd etilgen COVID-19 hastalarınıñ sayısında rekord qayd etile, oktâbrniñ 4-nde 435 hasta qayd etildi, oktâbrniñ 3-nde ise 421 hasta oldı. Qırımda sentâbr ayından itibaren qayd etilgen koronavirus hastalarınıñ sayısı er kün arta. Yerli Rospotrebnadzor idaresi yaqınlaşqan dördünci koronavirus dalğası aqqında bildirdi, faqat qırımlılar daa az aşı ola.
Qırım akimiyeti hasta sayısı artqanı içün COVID-19 hastaları içün qoşma yerler aça.
Qırımda sentâbrden başlap koronavirus hastalarınıñ sayısı arta. Yerli Rospotrebnadzor idaresi dördünci koronavirus dalğası olacaq, faqat qırımlılar daa az aşı ola, dep bildirdi. Qırımnıñ Rusiye yolbaşçısı Sergey Aksenov, yarımadada COVID-19 hastalarınıñ sayısı artsa da, akimiyet qoşma sıñırlavlar kirsetmeycek, dep ayttı.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
