Qırımda keçken künü 472 yañı koronavirus hastası qayd etildi, pandemiya başlağanından berli bu raqam rekord oldı. Qırımnıñ Rusiye sağlıq nazirliginiñ matbuat hızmeti oktâbrniñ 8-nde bildirgenine köre, keçken künü 9 insan koronavirustan vefat etti.
«Bir künde 417 kişi yahşı oldı, bütün müddet devamında 70 681 insan tüzeldi», – dep aytıla haberde.
Umumen Qırımda koronavirus pandemiyası başlağanından berli 82 748 COVID-19 hastası qayd etildi.
Soñki künleri Qırım ve Aqyarda koronavirus hastalarınıñ sayısı er kün arta.
Bir kün evelsi 461 yañı COVID-19 hastası aqqında haber etildi.
Hatırlatamız, altı künden berli bir künde qayd etilgen COVID-19 hastalarınıñ sayısında rekord qayd etile, oktâbrniñ 4-nde 435 hasta qayd etildi, oktâbrniñ 3-nde ise 421 hasta oldı. Qırımda sentâbr ayından itibaren qayd etilgen koronavirus hastalarınıñ sayısı er kün arta. Yerli Rospotrebnadzor idaresi yaqınlaşqan dördünci koronavirus dalğası aqqında bildirdi, faqat qırımlılar daa az aşı ola.
Qırım akimiyeti hasta sayısı artqanı içün COVID-19 hastaları içün qoşma yerler aça.
Qırımda sentâbrden başlap koronavirus hastalarınıñ sayısı arta. Yerli Rospotrebnadzor idaresi dördünci koronavirus dalğası olacaq, faqat qırımlılar daa az aşı ola, dep bildirdi. Qırımnıñ Rusiye yolbaşçısı Sergey Aksenov, yarımadada COVID-19 hastalarınıñ sayısı artsa da, akimiyet qoşma sıñırlavlar kirsetmeycek, dep ayttı.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
