Keçken künü Aqyarda 119 yañı COVID-19 hastası qayd etildi, 63 ve 79 yaşında eki insan koronavirus yuqunçından vefat etti, dep bildire şeerniñ Rusiye ükümeti.
«Umumen Aqyarda 18 401 insan yañı koronavirus yuqunçına oğradı. 16 070 kişi yahşı oldı, 788 kişi vefat etti. 503 insan közetile – bu insanlar hastalarnen alâqada oldı, COVID-19 diagnozı tasdıqlanmadı», – dep aytıla haberde.
Hatırlatamız, iyülniñ 13-nde Aqyarda künlik rekord oldı – 122 COVID-19 hastası.
Qırımda iyülniñ 15-i sabasına 381 yañı koronavirus hastası aqqında haber etildi. Bu raqam yarımadada bir künde qayd etilgen hasta sayısına köre rekord oldı.
Qırım ve Aqyardaki Rospotrebnadzor idaresiniñ yolbaşçısı Natalya Penkovskaya bildirgenine köre, keçken afta koronavirus yuqunçından vefat sayısında antirekord qayd etildi. Qırımda esasen ind ştammı tarqala.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
