Rusiye nezaretinde olğan Aqyarnıñ başlıqları teatrlarda ve kinoteatrlarda spektakller ve kinofilmelerniñ yüzde 50 tolmasınen kösterilmesine izin berdiler. Bunı şeerniñ başı Mihail Razvojayev bildirdi.
“Endi eki aftadan berli epidemiologiya vaziyetiniñ yahşılaşmasını köz ögüne alıp, kinotearlar ve teatrlarnıñ tolmasını yüzde 50-ge qadar arttırmaqnıñ mümkünligini baqıp çıqmağa teklif etem. Bu, kerekli mesafeni qorucaq, aynı zamanda müessiselerimizniñ özlerine daa işançlı is etmelirini temin etecek”, – matbuat hızmeti Razvodayevniñ aytqanlarından alıntı ketire.
O, bunıñ kütleviy sport tedbirleri keçirilgen qapalı zallarğa da ait olğanını qayd etti.
Fevralnıñ başından teatrlar, kinoteatrlar ve qapalı sport zalları yüzde 30 tolduruvnen çalışalar.
Aqyar akimiyeti, şeerde koronavirus tarqaluvı yavaşladı, dep bildire.
Aqyarda fevralnıñ 16-nda 78 yañı koronavirus hastası qayd etilgen, aynı zamanda 167 adam tüzelgen soñ hastahaneden çıqarılğan. 62 yaştan 86 yaşqa qadar dört hasta öldi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
