Aqyarda keçken künü dört yañı COVID-19 hastası qayd etildi. Hastalar arasında erkek ve onıñ beş ve doquz yaşında eki balası, em de daa evel hastalanğan insanlarnen alâqada olğan qadın bar, dep bildire şeerniñ Rusiye ükümeti.
Müessise koronavirustan vefat etken daa bir kişi aqqında bildire.
«88 yaşında qadın vefat etti. Diagnozı sağ olğanda tasdıqlandı. Hastalıq vaqtında eki taraflı pnevmoniya oldı», – dep aytıla haberde.
Akimiyetniñ malümatına köre, dört kişi yahşı olğan soñ hastahaneden çıqarıldı. Al-azırda 40 insan hastahanede buluna, 188 kişi yuqunç hastahanesinde közetile, №9 şeer hastahanesinde 120 insan buluna. 230 kişi yaşağan yerinde közetile.
Yılnıñ başından Aqyarda 360 insan yañı koronavirus yuqunçına oğradı, 299 kişi yahşı oldı, 11 insan vefat etti.
İyülniñ 31-nde berilgen malümatqa köre, Aqyarda 8 yaşında bala hastalandı.
Qırımda keçken künü 39 koronavirus hastası qayd etildi. Yerli akimiyetniñ malümatına köre, Qırımda 1386 yañı koronavirus hastası qayd etildi. Rusiye kontrolindeki yarımada akimiyetiniñ malümatına köre, avgustnıñ 4-ne qadar Qırımda 1323 yañı koronavirus hastası qayd etildi. 74-ü çetelden keldi, 111-i qomşu Rusiyeden kelgenler ve olarnen alâqada olğanlar. 986 insan yahşı oldı, 16 hasta koronavirustan vefat etti. Aqyarda 356 insan koronavirus yuqunçına oğradı, 295 kişi tüzeldi, 10 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
