Link açıqlığı

Saatnıñ esas haberi

Qırımda bir künde 39 yañı COVID-19 hastası qayd etildi, bir hasta vefat etti – akimiyet


Qırımda keçken künü 39 yañı koronavirus hastası qayd etildi, dep bildirdi Qırımnıñ Rusiye yolbaşçısı Sergey Aksenov. Qırımnıñ Rusiye sağlıq nazirliginiñ malümatına köre, daa bir hasta COVID-19-dan vefat etti. Soñki sefer eñ çoq koronavirus hastası – 38 insan – iyülniñ başında qayd etilgen edi.

«16-sı tibbiy yardım içün muracaat etkende belli oldı, 17-si daa evel qayd etilgenlernen alâqada olğanı içün belli oldı, 6-sı sağlam insannıñ skriningi neticesinde qayd etildi», – dep yazdı Aksenov Facebookta.

Yerli akimiyetniñ malümatına köre, Qırımda 1386 yañı koronavirus hastası qayd etildi. Rusiye kontrolindeki yarımada akimiyetiniñ malümatına köre, avgustnıñ 4-ne qadar Qırımda 1323 yañı koronavirus hastası qayd etildi. 74-ü çetelden keldi, 111-i qomşu Rusiyeden kelgenler ve olarnen alâqada olğanlar.

986 insan yahşı oldı, 16 hasta koronavirustan vefat etti. Aqyarda 356 insan koronavirus yuqunçına oğradı, 295 kişi tüzeldi, 10 kişi vefat etti.

Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.

Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.

O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.

2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.

XS
SM
MD
LG