Dekabrniñ 11-nde saba işğal etilgen Aqyarda 73 yañı COVID-19 hastası qayd etildi, dep haber ete şeerniñ Rusiye ükümetiniñ matbuat hızmeti.
«24 insan yuqunç, doquzıncı ve şeer hastahanelerine alındı, qalğanları ambulator tedaviylevde buluna. Hastalar – beş yaştan 81 yaşqa qadar insanlar. 110 kişi tüzelgen soñ çıqarıldı», – dep aytıla haberde.
Şeerniñ akimiyeti bildirgenine köre, bir künde Aqyarda 42 yaştan 69 yaşqa qadar beş insan vefat etti. Qayd etilgenine köre, episiniñ hronik hastalıqları bar edi.
Umumen yılnıñ başından Aqyarda 5136 insan yañı koronavirus yuqunçına oğradı. 4724 kişi tüzeldi, 163 kişi vefat etti.
«128 insan hastahanelerde buluna, 112 kişi – «İzumrudda». 95 insan ambulator tedaviylevde buluna. 558 kişi közetile – hastalarnen alâqada olğan, amma COVID-19 diagnozı tasdıqlanmadı», – dep qoştı matbuat hızmeti.
Hatırlatamız, keçken künü Qırımda 306 koronavirus hastası qayd etildi, 9-ınıñ hastalıq alâmetleri yoq.
Rospotrebnadzor, dekabr ayında avgust ayına köre koronavirus hastalarınıñ sayısı 13 qat arttı, dep bildirdi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
