Sentâbrniñ 22-nde saba Aqyarda 27 yañı COVID-19 hastası qayd etildi, dep bildire şeerniñ Rusiye ükümetiniñ matbuat hızmeti.
«Hastalar – 19 yaşından 81 yaşına qadar insanlar, 25-i yerli sakin ve eki kişi kelgen», – dep aytıla haberde.
Qayd etilgenine köre, keçken künü 56 yaşında er adam vefat etti.
«Hastalıqnı eki taraflı virus pnevmoniyası, nefes yetersizligi, aqcigerlerniñ şişmesi zorlaştırdı», – dep aytıla haberde.
Yerli akimiyetniñ malümatına köre, yılnıñ başından Aqyarda 845 insan yañı koronavirus yuqunçına oğradı, 556 kişi yahşı oldı, 23 insan vefat etti.
Al-azırda 233 insan şeer hastahanelerinde buluna, 205 kişi yuqunç hastahanesinde, 202 insan №9 şeer hastahanesinde, 455 kişi yaşağan yerde közetile.
Qırımda keçken künü dört hasta COVID-19-dan vefat etti ve 81 yañı koronavirus hastası qayd etildi. Yerli akimiyetniñ malümatına köre, umumen Qırımda 3889 yañı koronavirus hastası qayd etildi, 2469 insan tüzeldi. 51 insan koronavirustan vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
