Qırımda keçken künü dört hasta COVID-19-dan vefat etti, dep bildire Rusiye kontrolindeki Qırım sağlıq nazirliginiñ matbuat hızmeti.
Müessiseniñ derc etilgen malümatına köre, koronavirustan vefat etkenlerniñ sayısı 51 oldı.
Berilgen malümatqa köre, 2497 insan Qırımda tibbiy közetüv altında buluna. 527 kişi evde dinamik közetüvde qala, 1872 kişi hastahanede közetile. 98 insan observatorlarğa alındı.
Rospotrebnadzor malümatına köre, umumen Qırımda 3889 COVID-19 hastası qayd etildi. 1319 insan tedaviylene, 2468 kişi tüzelgen soñ hastahaneden çıqarıldı.
Keçken künü Qırımda 81 koronavirus hastası qayd etildi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
