Cumaertesi künü, oktâbrniñ 24-nde, Aqyarda 57 yañı COVID-19 hastası qayd etildi. Bütün hastalar – 18 yaşından 83 yaşına qadar yerli sakinler, dep bildire Rusiye kontrolindeki şeer ükümeti.
«38 insan tüzelgen soñ yiberildi. 75 yaşında er adamı vefat etti. Hastalıqnı hronik hastalıqlar sebebinden eki taraflı virus-bakterial pnevmoniyası ağırlaştırdı. Yılnıñ başından Aqyarda 1913 insan yañı koronavirus yuqunçına oğradı. 1262 insan tüzeldi, 56 kişi vefat etti», – dep aytıla haberde.
Berilgen malümatqa köre, 231 insan koronavirus diagnozınen hastahanede buluna: 89 kişi yuqunç hastahanesinde, 134 kişi doquzıncı şeer hastahanesinde, sekiz insan Mudafaa nazirliginiñ hastahanesinde buluna.
«İzumrudda» – 70 insan. 249 kişi ambulator tedaviylevde qala. 392 insan közetile – hastalarnen alâqada olğanlar, COVID-19 diagnozı tasdıqlandı. «Solnışko» pansionatı observator rejiminde çalışa», – dep aytıla haberde.
Rusiye kontrolindeki Qırım yolbaşçısı Sergey Aksenov yarımadada qayd etilgen 204 yañı koronavirus hastası aqqında bildirdi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
