Kreml kontrolindeki Qırım yolbaşçısı Sergey Aksenov yarın, mayısnıñ 7-nde, yarımadada koronavirus qırğınlığı vaziyetinde mayısnıñ 12-nden soñ olacaq iş tertibi aqqında tarif etmege vade ete. Onıñ aytqanına köre, soñki qararlar qomşu Rusiyeniñ prezidenti Vladimir Putin ile yapılacaq toplaşuvdan soñ qabul etilecek.
«Prezidentimizniñ reberligi altında qoşma qol tutuv tedbirleri ilân etilecek ve federal ükümet azaları 12-nden soñ olacaq iş tertibini teklif etecek toplaşuv bugün keçirilecegine köre, iş planını yarın taqdim etecekmiz», – dep ayttı Aksenov yañı koronavirus yuqunçınıñ tarqaluvı ile küreş operativ ştabınıñ toplaşuvında.
Mayısnıñ 6-nda Putin koronavirus ile küreş qararlarınıñ yerine ketirilüvinen bağlı toplaşuv keçirmege planlaştıra. Matbuat kâtibi Dmitriy Peskovnıñ bildirgenine köre, bu toplaşuvda sıñırlav rejiminden adım-adım çıquv teklifleri de muzakere etilecek.
Mayısnıñ 1-nden itibaren işğal etilgen Qırımda Rusiye akimiyeti koronavirus telükesi sebebinden kirsetilgen tedbirlerden soñ bazı saalarnıñ işini yañıdan başlatmağa izin berdi. Bundan soñ Aksenov çalışmasına izin berilecek müessiselerniñ qoşma cedvelini ilân etecek, dep bildirdi.
Al-azırda Qırımda 160 yañı koronavirus hastası qayd etildi. 21-i çetelden keldi, 17-si – Rusiyeden. 22 hastanıñ Rusiyeden kelgenlernen alâqası oldı, 100 kişi laboratoriyada tasdıqlanğan hastalarnen alâqada olğan edi. 41 kişi tüzeldi. Bir hasta vefat etti. Aqyarda 98 COVID-19 hastası bar, eki insan vefat etti.
Qırımnıñ Rusiye akimiyeti bildirgenine köre, mayısnıñ 12-nden itibaren maska rejimini kirsetmege azır. Daa evel Qırımda yüksek seviyeli azırlıq rejimi mayısnıñ 11-ne qadar uzatılğan edi, Aqyarda onı mayısnıñ 30-na qadar uzatqanlar.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
