Rusiye ve Qırımdaki akimiyet yaqında keçirilecek "Qırım platforması"nı körmemezlikke urıp olamay ve iştirakçilerni "ağırtıcı aqibetler" ile tehdit ete, çünki sammit "yarımadanıñ işğalden azat etilüvine ve reintegratsiyasına yoldır". Bunı Qırım.Aqiqatqa Ukraina prezidentiniñ Qırım MC-deki daimiy temsilcisi Anton Körineviç bildirdi.
«Olar körmemezlikke urıp olamaylar, çünki ciddiy iş ketkenini köreler. Ukraina "Qırım platforması"nıñ tesis sammitini keçire. Sammitte halqara ortaqlarımız yüksek seviyede temsil olunacaq. Böyle bir sammit evel daa olmağan edi. Kyivde pek çoq çetel memleketniñ liderleri olacaq, şunıñ içün Rusiye qarşılıq köstere», – dedi o.
Körineviçniñ bildirgenine köre, "Qırım platforması" Rusiye topraq bütünligine qast etmey.
«Ukraina muvaqqat işğal etilgen toprağınıñ işğalden azat etilüvine ve reintegratsiyasına yaqınlaşa. Şunıñ içün bu yerde söz yalıñız Ukrainanıñ topraq bütünligi ve onıñ ğayrıdan tiklenilüvi aqqındadır», – dep qayd etti Körineviç.
Evel, Kremlniñ nezareti astında olğan Qırım Nazirler Şurasınıñ reis muavini, Qırımnıñ Rusiye prezidenti yanında daimiy temsilcisi Georgiy Muradov, «Qırım platforması» iştirakçilerini «ağırtıcı aqibetler» bekley, dep bildirdi.
Ukraina Tış işler naziri Dmıtro Kuleba avgustnıñ 23-ne planlaştırılğan «Qırım platformasınıñ» sammitinde 38 memleket iştirak etmege razı oldı, dep bildirdi.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Ukraina Tış işler naziriniñ birinci muavini Emine Ceppar Qırım.Aqiqat Radiosınıñ yaynında, kelecek yılnıñ mayıs ayında keçirilmesi planlaştırılğan yarımadanı işğalden azat etüv «Qırım platforması»sammitiniñ neticelerine köre muvafıq beyanname qabul etilecek, dep bildirdi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
