Qırım MC Ukraina prezidentiniñ daimiy temsilcisi Anton Korineviç Qırımda insan aqlarınıñ bozulması ile bağlı vaziyet içün Rusiyege qarşı sanktsiyalar tazyığınıñ arttırılmasına çağırdı. Bu aqta o, noyabrniñ 19-nda Jenevada BMT-niñ azlıqlar meseleleri forumınıñ 13-nci virtual sessiyası vaqtında ayttı.
İdareniñ malümatına köre, Korineviç Qırımdaki Rusiye mediasınıñ qırımtatarlarğa, qavmiy ukrainlerge ve diniy azlıqlarğa qarşı duşman tilini qullanğanını aytqan.
“Kremlniñ tecavuziy siyaseti qavmiy ve diniy sebeplerden duşmanlıq doğurmaq içün yapıla. İşğal etilgen Qırımda insan aqlarınıñ bozulmasını toqtatmaq içün, onı işğalden azat etmek ve Ukraina idaresi astına qaytarmaq kerek. Bunı yapmak içün ise, Rusiye Federatsiyasına qarşı sanktsiyalar tazyığını qaldırıp onı arttırmaq kerek”, - dedi Anton Korineviç.
AB Şurası, Avropa Birliginiñ fikirince, Ukraina topraq bütünligi ve suverenitetini bozğan şahıs ve teşkilâtlarğa qarşı şahsiy sanktsiyalarğa Keriç köprüniñ qurucılığı ile alâqası olğan eki şahıs ve dört şirketni qoşmağa qarar aldı.
Yañı sanktsiyalar cedveline Aleksandr Ganov, "Grand Servis Ekspress" baş müdiri, ve Leonid Rıjenkin, "Straygazmontaj" şirketiniñ infrastruktura leyhalarınıñ baş müdir muavini, kirgenler. Sanktsiyalarğa "Lenpromtransproyekt", Direktsiya po stroitelstvu jeleznoy dorogi Berkakit-Tommot-Yakutsk tren Yolunı quruv direktsiyası, Qırım tren yolu, Qırımnıñ ilk sigorta şirketi oğradılar.
Rusiye prezidenti Vladimir Putin ğarbiy memleketlerniñ Qırım işğali sebebinden kirsetken sanktsiyalarını "saçma" dep adlandırdı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan "referendum" olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD "referendumdaki" rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege "qoşulğanını" ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña "tarihiy adaletniñ tiklenmesi", dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
