Rusiye prezidenti Vladimir Putin ğarbiy memleketlerniñ Qırım işğali sebebinden kirsetken sanktsiyalarını «saçma» dep adlandırdı.
Bu aqta o, cumaaqşamı künü «Valday» munaqaşa klubınıñ umumiy toplaşuvında ayttı.
«Qırımlılarğa qarşı sanktsiyalar kirseteler: bu ilhaq olsa – olar qurbanmı? Ne içün olarğa qarşı sanktsiyalar kirseteler? Olar rey bergen olsa, bu bir demokratiya alâmetidir. Demokratiya içün cezalamaq mümkünmi? Saçma, olmaycaq şey. Amma bu ola», – dep bildire Rusiye prezidentiniñ aytqanlarını TASS.
Putin, Türkiye prezidenti Recep Tayyip Erdoğannıñ Rusiyeniñ Qırım ilhaqını tanımaması oña «meraqlı degil», dep bildirdi.
ABD, Avropa Birligi, Büyük Britaniya Qırım işğali sebebinden em umumiy, em şahsiy sanktsiyalarnı devam ettire.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
