Qırımnıñ Rusiye parlamentiniñ spikeri Vladimir Konstantinov RF-da qısmiy seferberlik ilân etilgeni içün Rusiye ve işğal etilgen Qırımdan ketkenlerni keri yibermemek teklif etti. Bunıñ aqqında o telegram kanalında yazdı.
"İza etile bilemegenden seferberlikten qaçınuvdır. Zaten ondan çetelge qaçqanda, menimce, eñ esası olarnı keri yibermemektir. Böyle qaçmanıñ da müsbet bir tarafı bar: memleketimizde tek onı imaye etmek azır olğanlar qalsınlar. Böyle bir memlekette yaşamaq daa yahşı, daa telükesiz olacaq", - dep yazdı o.
O qayd etti ki, Rusiye Fedaratsiyası prezidentiniñ qısmiy seferberlik aqqında fermanını ömürge keçirgen Rusiye arbiy komissarları tarafından "bazı hatalar" olğan, amma şimdi "olar tüzetile".
Sentâbrniñ 21-nde Rusiyede ilân etilgen qısmiy seferberlik sebebinden Qırım ve Aqyarnıñ Rusiye akimiyeti askerlikke aluv komissiyalarını quruv aqqında bildirdi. Sergey Aksenov esas Ukrayınağa 1200 «göñüllini» yolladı ve daa eki batalyon azırlay, dep bildirdi.
Qırımdaki Rusiye kütleviy haber vastaları «añlaşmalı arbiy hızmetniñ» reklamasını yapa.
İşğal etilgen Qırımnıñ tahminen 5000 sakini Rusiye prezidenti ilân etken qısmiy seferberlikten soñ arbiy komissarlıqqa celpname aldı.
Daa evel berilgen malümatqa köre, Qırım ve Aqyarda Rusiyeniñ Ukrayınağa qarşı cenkinde ölgen Rusiye arbiylerini defin etmege devam eteler.
Ukrayına prokuraturasınıñ malümatına köre, 2015 senesinden başlap Rusiye Qırımda Rusiye Federatsiyasınıñ silâlı quvetlerine askerlikke aluv qanunsız kampaniyasını 15 kere keçirdi. Aq qorçalayıcılar Qırım ve Aqyar sakinleriniñ Rusiye ordusına aluvını halqara uquq bozuluvı dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
