Komitet Yuqarı Radağa Tamır halqlar qanunını qabul etmesini tevsiye etti – Umerov

Ukraina Yuqarı Radasınıñ insan aqları komiteti parlamentke tamır halqlar qanunını temel olaraq ve umumen qabul etmesini tevsiye etti. Bu aqta Yuqarı Rada deputatı, Ukrainanıñ PACE eyyetiniñ azası Rustem Umerov bildirdi.

«Anayasada tam yazılğan – tamır halqlarnıñ aqlarını yalıñız Ukraina qanunı belgilemekte. Olmağan qanun! Maqsadımız belli – qanunlardaki bu boşluqnı toldurıp, tamır halqlarnıñ aqlarını qorumaq. Tamır halqları olğan memleketlerniñ böyle qanunı bar. Bu müim ve Ukraina içün tarihiy bir vesiqa», – dep yazdı Umerov Facebookta.

O, Rada qanunnı «yaqın künlerde» qabul eter, dep ümüt ete.

Ukraina prezidenti Volodımır Zelenskıy mayısnıñ 18-nde qırımtatar genotsidiniñ qurbanlarını añma kününde Ukraina yarımadanı kontrol altına qaytarmaq içün ğayret köstere, dep qayd etti. O, tamır halqlar qanun leyhasını parlament baqsın dep kirsetti, dep haber etken edi.

Zelenskıynıñ qayd etkenine köre, o, «Qırım platforması» sammiti ögüne qırımtatarlar ve qırımlılar içün «müim olğan» qanunlarnı imzalamağa istey, dep qayd etken edi.

Rusiye prezidenti Vladimir Putin Ukrainanıñ tamır halqlar qanun leyhası «ruslarğa qarşı yapılğan küçlü bir darbe» ola, dep bildirdi.

Ukraina prezidentiniñ Qırım Muhtar Cumhuriyetindeki temsilcisi Anton Korınevıç Rusiye prezidenti Vladimir Putinniñ Ukrainanıñ «tamır halqlar» qanun leyhasınen bağlı izaatlarını «propagandacı» dep adlandırdı.

İyünniñ 8-nde Rusiye Devlet Duması Ukrainanıñ qanun leyhasını takbih etken beyanatnı qabul etip, PACE ve OSCEge muracaat etmege niyetleri bar, dep bildirdi.

Yuqarı Rada deputatı, Ukrainanıñ PACE eyyetiniñ azası Rustem Umerovbuña cevap berip, «iç bir memleketniñ Ukrainanıñ iç işlerine qarışmağa aqqı yoq», dep qayd etti.