İyülniñ 3-nde berilgen malümatqa köre, Keriçte vaqtınca yerleşüv noqtalarında 129 adam qala, olardan 27 bala. Bunıñ aqqında Qırım boyunca Rusiye FVN matbuat hızmeti haber etti.
Nazirlikniñ malümatına köre, 10 komissiya taqımı ketirilgen zararğa qıymet kesti, 620 akt tizildi.
«Para berildi: 834 adamğa 10 biñer ruble, 85 adamğa 50 biñer ruble, 682 adam 100 biñer ruble. Episi olıp 80 790 000 ruble», – dep yazıla bildirmede.
Qırım boyunca Rusiye FVN malümatına köre, cemaat naqliyatı er vaqıt kibi qatnay.
Наводнение в Керчи: эвакуация в городе (фотогалерея)
Qırımnıñ Rusiye fevqulâde vaziyetler nazirligi idaresi bildirgenine köre, 2021 senesi iyünniñ 16-ndan 18-ne qadar küçlü yağanaqlar neticesinde 426 azbar, 356 ev, 18 içtimaiy ceetten müim obyektni suv bastı. İyünniñ 22-nde saba, Qırım qurtarıcılarınıñ malümatına köre, Yalta ve Yedi Quyu rayonında 37 ev suvda qala. Umumen suv basqan yerlerden 1783 insan tahliye etildi.
Qırımnıñ Rusiye ükümetiniñ yolbaşçısı Yuriy Gotsanük iyünniñ 25-nde Fevqulâde vaziyetler komissiyasınıñ toplaşuvında Qırımda selden kelgen zarar 200 million rubleden çoq oldı, dep bildirdi.
Akimiyet Qırımnıñ yedek fondundan 161 mln 160 biñ ruble yarımadadaki fevqulâde vaziyet aqibetlerini yoq etmek içün sarf etmege qarar berdi.
