Keriç başlıqlarınıñ bildirgenine köre, avgustnıñ 14-i sabası itibarınen şeerde vaziyet turğundır. Tünevin şiddetli yağanaqlar sebebinden soqaqlarnı, evlerni ve azbarlarnı suv bastı. Şeerdeki soqaqlardan birinde yol alâ daa suv astındadır, avtobuslarnıñ areketi deñişti.
«Melek Çeşme özeninde suv seviyesi azlaşa. Şimdiki vaqıtta Samoylenko soqağındaki yol suv astında qalmaqta, bu sebepten naqliyat areketi deñiştirildi», – dep haber etile memuriyette.
Keriçteki suv basuvı: ev ve soqaqlarnı suv bastı, sakinlerni tahliyege azırlaylar (fotoresimler)
Qırımda avgustnıñ 10-ndan 12-ne qadar yağğan küçlü yağmurlar neticesinde 95 mustaqil evni ve 192 azbarnı suv bastı, dep bildirdi Qırımnıñ Rusiye ükümetiniñ yolbaşçısı Yuriy Gotsanük.
Qayd etmeli ki, sinoptikler raatlıq künleri Qırım şarqında yañı boranlı yağmurlar yağacaq, dep tahmin ete.
Keriçte Gluhov soqağındaki 40 ev suv basuv telükesi altında buluna.
Qırımnıñ Yedi Quyu rayonında sağanaqlar neticesinde Melek Çeşme özenine kirgen Qıdırlez özeni suv toldı. Qırım.Aqiqat mühbiriniñ bildirgenine köre, Qıdırlez özeniniñ furtunalı aqımı Keriç tarafına kete. Yedi Quyu rayonındaki Qıdırlez özeni şeer stadionı rayonında Melek Çeşmege kire.
Keriç yolbaşçısı vazifelerini vaqtınca eda etken Svâtoslav Brusakov Keriçniñ alçaq rayonlarında yaşağan sakinlerni tahliyege azır olmaq kerek, dep tenbiledi.
Daa evel berilgen malümatqa köre, Qırımnıñ şarqındaki Köp Kenegez (Krasnogorka) köyünde sağanaqlar neticesinde 170 azbarnı suv bastı.
Qırımdaki Rusiye Fevqulâde vaziyetler nazirliginiñ idaresi avgustnıñ 13-ne, 14-ne furtuna ihtarını ilân etti – yarımada şarqında ava bozulacaq, dep tahmin etile.
Qırımlı sinoptiklerniñ malümatına köre, şarqiy Qırımnıñ yaoısında avgustnıñ 13-nde eki metrlik dalğalar olacaq.
«Fobos» Rusiye ava merkeziniñ mütehassısı Yevgeniy Tişkovetsniñ bildirgenine köre, Qırımda sağanaqlar sebebinden «Nuh tufanı» beklenile.