Küçlü yağanaqlar neticesinde Keriçniñ merkeziy soqaqlarını suv bastı. Şeerniñ Rusiye akimiyetiniñ malümatına köre, Samoylenko ve Borzenko soq. çaprazı, 50 yıllıq Oktâbr stadionı rayonında Yeremenko soqağını suv bastı. Bu soqaqlar qapatıldı.
Keriç yolbaşçısı vazifelerini vaqtınca eda etken Svâtoslav Brusakov Keriçniñ alçaq rayonlarında yaşağan sakinlerni tahliyege azır olmaq kerek, dep tenbiledi. Qırımnıñ Rusiye ükümetiniñ yolbaşçısı Yuriy Gotsanükniñ malümatına köre, Keriç, Kefe, Yedi Quyu ve İslâm Terek rayonları «eñ büyük telüke altında» buluna.
Qırımda avgustnıñ 10-ndan 12-ne qadar yağğan küçlü yağmurlar neticesinde 95 mustaqil evni ve 192 azbarnı suv bastı, dep bildirdi Qırımnıñ Rusiye ükümetiniñ yolbaşçısı Yuriy Gotsanük.
Qırımnıñ Yedi Quyu rayonında sağanaqlar neticesinde Melek Çeşme özenine kirgen Qıdırlez özeni suv toldı. Qırım.Aqiqat mühbiriniñ bildirgenine köre, Qıdırlez özeniniñ furtunalı aqımı Keriç tarafına kete.
Qırımdaki Gidromettsentr matbuat hızmeti avgustnıñ 13-nde ve avgustnıñ 14-nde gece Qırımnıñ şarqiy rayonlarında küçlü yağmurlar (50 mm-den çoq), boranlı yağmur, iri burçaq yağması, küçlü ruzgâr esmesi beklenile. Keriçte, Ukrgidromettsentr malümatına köre, yağmur ve boranlı yağmur yağacaq. Şimaliy yel saniyede 7-12 metr olacaq. Gece ava arareti +18…+20°, kündüz +25…+27° olacaq.
Qırım.Aqiqat Keriçteki ve Qırımdaki vaziyetni taqip etmege devam ete. Fotoresimler qoşula.
Facebook Forum