Keriç politehnik kollecinde çarşenbe künü, oktâbrniñ 17-nde, patlav yüz berdi. Qırım kütleviy haber vastalarınıñ malümatına köre, 10 insan elâk oldı, 50 kişi yaralandı. Rusiye akimiyeti bomba patlağanını bildire.
Keriçteki oquv yurtunda olğan patlav aqqında içtimaiy ağlarnıñ qullanıcıları yazmağa başlağan edi.
Rusiyeniñ terrorizmge qarşı milliy komiteti bildire ki, köllecde bomba patlatıldı.
«Keriçte belli olmağan bir patlayıcı patlatıldı», dep tekrarlay komitetniñ malümatını «İnterfaks» (bundan evel agentlikniñ menbaları, patlav yerine qaza-gaz hızmeti keldi, dep bildirgen edi, «Krıminform» ise oquv yurtunda gaz patlağanını yazğan edi – QA).
Rusiyeniñ terrorizmge qarşı komiteti, ilk malümatqa köre, 10 insan elâk oldı, 50 kişi yaralandı, dep bildire. Yaralanğanlar şeerniñ tibbiy müessiselerine alına.
Qırımdaki Rusiye Fevqulâde vaziyetler hızmetiniñ idaresi bu malümatnı daa tasdıqlamadı.
«Kerç – moy gorod» saytınıñ mühbiri bildire ki, patlav neticesinde yaralanğanlar bar. Qaza yerine «ilk yardım», qurtarıcılarnıñ maşinaları kele, rayonnı politsiya sarıp aldı.
Patlav yeriniñ fotoresimlerinde sındırılğan pencere çerçiveleri ve qurtarıcılar ve ekimlerniñ maşinaları körüne.
Şeer kollecinde olğan patlavdan soñ anda Qırımnıñ Rusiye yolbaşçısı Sergey Aksenov yol aldı.
«Patlav aqibetlerini yeñmek ve yaralanğanlarğa yardım etmek içün Keriç politehnik köllecine acele yol aldım. Patlav sebeplerini belli organlar ögrene. Bütün hızmetler qaza yerinde çalışa», – dep yazdı Aksenov Facebookta.
Telâş ve qorqu. Keriçteki patlav tafsilâtları (fotoresimler)
«Keriç politehnik kolleci» – devlet bücet tasil müessisesidir, onıñ tesisçisi Qırımnıñ Rusiye tasil nazirligi ola. Müessise saytınıñ malümatına köre, mında aşçı, qaynaqçı, muasebeci, tehnolog ve berberler oquy.
