Qurucılar Keriç köprüniñ birinci yolağında relslerni bağladı, dep bildire “Krımskiy most” haber merkezi.
“Qurucılar, köpürniñ birinci yolağında rels ve şpalalarnı töşemesini bitirdi. Bu yolaqtan poyezdler yarımadadan qıtağa (qomşu Rusiyege - QA) qatnaycaq. Yolaq Keriç boğazınıñ eki yalısından töşele edi: brigadalar eki taraftan biri-birine taba ketip çalışa edi ve kemer çatısı tübünde rastkelişti. Qurulışnıñ baş qısmında “Taman” ve “Keriç” buğumları bağlandı”, - dep bildirdiler haber merkezinde.
Qayd etilgeni kibi, 19 kilometrlik demiryol hattını töşemek içün, 5 biñ tonna rels ve 38 biñ demirbeton şpala qoyulğan edi, qurucılar daa ekinci demiryol yolağında 7 kilometr rels şpala parmaqlığını qoymalı.
Aprelde Keriç köprüniñ qurucıları Qırım yarımadası tarafından köpür keçitiniñ demiryol qısmında rels töşemege başladı, dep bildirilgen edi.
Keriç boğazındaki köpürniñ maşina qısmı yengil maşnalarnıñ keçişine bu sene mayıs ayında açıldı. Oktâbrniñ 1-nde yük maşnalarınıñ areketi açıldı. Köpürniñ demiryol qısmı daa qurulmadı.
Ukraina prezidenti Petro Poroşenko Rusiye işğal etken Qırımda Keriç köprüniñ qanunsız qurucılığı Kremlniñ halqara uquqqa emiyet bermegeniniñ daa bir delili ola, dep bildirgen edi.
Avropa Birligi ve ABD Rusiye ve işğal altındaki Qırım arasındaki Keriç köprüniñ qısmen açılışını takbih etti. Ukraina tarafı 2014 senesi Qırım ilhaq etilgen soñ Rusiye ile köpür qurucılığı añlaşmasından çıqtı.
