Keriç köprüniñ qurucıları Qırım yarımadası tarafından köpür keçitiniñ demiryol qısmında rels töşemege başladı, dep bildire «Krımskiy most» (Qırım köprü – QA) Rusiye haber merkezi.
Qayd etile ki, köpür qurucıları 38 kilometr rels töşemeli. Taqımlar Qırım ve qomşu Rusiyeniñ Kuban tarafından biri-birine taba kete. Taman tarafından relsler keçken sene yazda töşemege başladılar. Bugünki künge qadar köpürde rels şpala parmaqlığınıñ yarısından ziyadesi qoyuldı, dep qayd ete haber merkezi.
Daa evel haber etilgeni kibi, Rusiyeniñ arheologiya institutınıñ alimleri Keriç civarındaki «Tavrida»yolunıñ qurucılığı alanında «Gorodişçe 11 kilometr» qasabasındaki qazuvlarda Roma imperatorlığınıñ zamanlarından qalğan köy çiftligini taptı. Mında Bospor çarlığınıñ «orta sınıf» temsilcileri yaşağan edi.
Keriç boğazındaki köpürniñ maşina qısmı yengil maşinalarnıñ keçişine bu sene mayıs ayında açıldı. Oktâbrniñ 1-nde yük maşinalarınıñ areketi açıldı. Köpürniñ demiryol qısmı daa qurulmadı.
Ukraina prezidenti Petro Poroşenko Rusiye işğal etken Qırımda Keriç köprüniñ qanunsız qurucılığı Kremlniñ halqara uquqqa emiyet bermegeniniñ daa bir delili ola, dep bildirgen edi.
Avropa Birligi ve ABD Rusiye ve işğal altındaki Qırım arasındaki Keriç köprüniñ qısmen açılışını takbih etti. Ukraina tarafı 2014 senesi Qırım ilhaq etilgen soñ Rusiye ile köpür qurucılığı añlaşmasından çıqtı.
