Gece Keriç köpründe tutulğan qırımtatarlarğa saba saat 7-lerde (yerli saatnen) vesiqaları qaytarıldı. On saat beklegn insanlar Qırımğa qayta, dep bildire «Qırım birdemligi» birleşmesi.
«Vatandaşlarnıñ pasportları aselet bütün gece tutıp, uzun aralıqlarnen qaytardılar. Aydavcı şeadetnameleri ve naqliyatnıñ tehnik pasportları tek saba qaytarıldı. FSB ve İç işler nazirligi faal ve soy-soplarnıñ suallerine aynı cevap bere edi – «çezemiz». Bu Yol areketi telükesizligi devlet inspektsiyasınıñ yol patrul hızmeti hadimleri tarafından yapılğan emsalsiz areketlerdir, olarnı subetleşkende özüni tanıtmağan ve adiy urbada olğan FSB hadimleriniñ basqısı altında yaptı», – dep bildire faaller.
Aq qorçalayıcı Lutfiye Zudiyevanıñ Qırım.Aqiqatqa bildirgenine köre, insanlar Qurmandaki «Hizb ut-Tahrir davası» mabüsleriniñ ükmü çıqarılacaq Rostov-na-Donuğa mahkemege ketmemege qarar aldı, çünki zaten keç qalacaqlar.
«Faaller Rostov yolu tahminen 6 saat devam etkeni ve saat 10-da oturışuvda olmaycaqları içün Qırımğa qaytmağa qarar berdi. Bundan ğayrı, faaller yolğa devam etseler, olarnı maşina baqılğan alanında tuta bileler, anda da bir qaç saat daa qalmaları mümkün, dep tahmin etti. Yolcular arasında esli-başlı insanlar, qadınlar pek çoq. İnsanlar pek üşüdi, köpürde aqşam 9-dan berli turdılar, şunıñ içün bir qarar alındı», – dep añlattı Zudiyeva.
«Qırım birdemligi» birleşmesi bildirgenine köre, noyabrniñ 2-nde aqşamdan berli Qurmandaki «Hizb ut-Tahrir davasınıñ» mabüslerine üküm çıqarılacaq Rostov-na-Donuğa Qırımdan yol alğan yüzlernen qırımtatarı Keriç köpründe Rusiye yol patrul hızmetiniñ hadimleri tarafından tutula. Rusiye uquq qoruyıcı organları vaziyetni resmiy şekilde izaatlamay.
Advokat Nikolay Polozovnıñ qayd etkenine köre, Rusiye quvetçileri qırımtatar faalleriniñ «areket serbestligi aqqını» bozdı.
Noyabrniñ 3-nde mezkür dava mabüslerine üküm çıqarılacaq, dep beklenile. prokuror qırımtatarlarnı qabaatlı tanıp, sert rejimli koloniyada qalmalarına üküm etmege talap etti: Rustem Emiruseinov içün 1,5 yıl nezaret ile 18 yıl apis, Arsen Abhairov içün 15 yıl, Eskender Abdulganiyev içün 16 yıl.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
