«Qırım birdemligi» birleşmesi bildirgenine köre, noyabrniñ 2-nde aqşamdan berli Qurmandaki «Hizb ut-Tahrir davasınıñ» mabüslerine üküm çıqarılacaq Rostov-na-Donuğa Qırımdan yol alğan yüzlernen qırımtatarı Keriç köpründe Rusiye yol patrul hızmetiniñ hadimleri tarafından tutula. Rusiye uquq qoruyıcı organları vaziyetni resmiy şekilde izaatlamay.
«Qırımnıñ farqlı rayonlarında ve Keriç köprü kirişinde yol patrul hızmetiniñ hadimleri tuta, şahsiyet teşkerilecek dep, bütün yolcularnıñ pasportlarını toplağanlar. Bazı aydavcılarnı 200 biñ ruble para cezasınen qorquzalar, yol patrul hızmetinen keri qaytmağa teklif eteler. Keriç köpründeki yol patrul hızmetiniñ noqtasına OMON ve Rosgvardiya keldi», – dep bildirdi faaller.
Qırımlı aq qorçalayıcı Lutfiye Zudiyevanıñ bildirgenine köre, Keriç köpründe aman-aman 200 qırımtatarı blok etildi.
«Aman-aman 200 qırımtatarı Keriç köprü rayonındaki inspektsiya-baquv radiometrik kompleksinde blok etildi. Köpür saba saat 8-ge qadar qapatıldı, dep haber etile. Emir qaydan keldi – ögrenile. Maşinalarnı turaqlarğa yollaylar. İnsanlarnı aqşam 9-dan qanunsız tutıp, sağlıqlarını telükege oğratalar – aş, sıcaq içecek yoq. Bu gece ava arareti +12. Tutulğanlar arasında esli-başlı insanlar ve qadınlar bar», – dep bildirdi Zudiyeva.
Daa soñra insanlarğa pasportları yavaş-yavaş qaytarıla, amma köpür keçişi qapalı qala, dep haber etildi.
«Aydavcı şeadetnamelerini daa kimsege qaytarmadılar. Hadimler tutuv sebeplerini daa kimsege añlatmadı», – dep bildirdi faaller.
Olarnıñ fikirince, uquq qoruyıcılar insanlarğa bugün ükmü çıqarılacaq semetdeşlerine yardım etmelerine imkân bermemege tırışa.
Rusiyeniñ Rostov-na-Donu şeerindeki Cenübiy okrugınıñ arbiy mahkemesinde noyabrniñ 2-nde Qurmandaki «Hizb ut-Tahrir davasınıñ» mabüsleri Rustem Emiruseinov, Arsen Abhairov ve Eskender Abdulganiyev soñki sözüni ayttı.
Noyabrniñ 3-nde mezkür dava mabüslerine üküm çıqarılacaq, dep beklenile. prokuror qırımtatarlarnı qabaatlı tanıp, sert rejimli koloniyada qalmalarına üküm etmege talap etti: Rustem Emiruseinov içün 1,5 yıl nezaret ile 18 yıl apis, Arsen Abhairov içün 15 yıl, Eskender Abdulganiyev içün 16 yıl.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
