Keriç oquv yurtunda olğan patlav ve atışuvda yaralanğan yigirmi dört insan Qırım, qomşu Rusiyeniñ Moskva ve Krasnodar hastahanelerinde qala. Bu aqta TASS Qırımnıñ Rusiye sağlıq naziriniñ muavini Nikolay Derkaçnıñ malümatına esaslanıp bildire.
«Umumen 24 insan hastahanelerde qala – Moskvada, Krasnodarda, bizde. Alları stabil, bir qarar», – dep yaza memurnıñ aytqanlarını kütleviy haber vastaları.
Qırımnıñ hastahanelerinde orta ve yengil ağırlıq allarında yedi insan qala.
Oktâbrniñ 17-nde, çarşenbe künü, Keriç politehnik kollecinde patlav ve atışuv oldı. Rusiye Tahqiqat komitetiniñ malümatına köre, Keriç politehnik kollecinde olğan patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi». Facia neticesinde 21 insan elâk oldı. Qırımda üç künlik matem ilân etilgen edi.
Oktâbrniñ 19-nda Keriçte ve Yedi Quyu rayonında ücüm qurbanlarınıñ cenazeleri qılındı. Vedalaşuv merasimine biñlernen insan keldi.
Qırım Muhtar Cumhuriyetiniñ prokuraturası Keriç politehnik köllecinde olğan patlavnı terror ücümi olaraq tasnif ete.
