Rusiye kontrolindeki Qırım Yuqarı mahkemesi 64 yaşında qırımtatar faali Kazim Ametovnıñ SİZOda yaramay şaraitlerde tutulğanı içün tazminat miqdarını 50 biñ rublege eksiltti. Bu aqta «Qırım birdemligi» cemaat birleşmesi advokat Rustem Kâmilevniñ malümatına esaslanıp bildire.
İşğal altındaki Qırımda Rusiye Cezalarnı yerine ketirüv federal hızmetiniñ idaresi Jeleznodorojnıy rayon mahkemesiniñ faalge SİZOdaki işkence şaraitleri sebebinden tazminat tölemek qararına qarşı şikâyet etken edi. Oña 190 biñ ruble para cezası berildi, imaye 521 biñ ruble talap etken edi.
«SİZO memuriyeti delil olaraq iş vesiqalarını taqdim etti. Lâkin, imayeciniñ fikirince, bu Kazim Ametovnıñ aqları bozulmağanını isbatlamay. İstinaf mahkemesi tazminat miqdarını 50 biñ rublege eksiltti, amma birinci instantsiya mahkemesi zaten imaye tarafı talap etken miqdardan daa az tazminat qararı aldı», – dep aytıla haberde.
Kâmilevniñ aytqanına köre, o, bu qararnı müvekkilinen muzakere etmege niyetlene.
«Temyiz mahkemesine ve Avropa insan aqları mahkemesine muracaat etecekmizdir, çünki tazminatnı uyğun dep körmeymiz», – dedi advokat.
Rusiye kontrolindeki Aqmescitniñ Jeleznodorojnıy rayon mahkemesi qırımtatarı Kazim Ametovnıñ SİZOğa qarşı davasını qanaatlendirip, kameradaki şaraitler yahşı olmağanı içün oña 190 000 ruble tölemesine qarar berdi.
Rusiye kontrolindeki Sudaq şeer mahkemesi 2021 senesi aprelniñ 12-nde «Veciye Kaşka davası» boyunca mahküm etilgen Kazim Ametovnıñ şartlı apis cezasını lâğu etti, mahkümiyetini bağışladı.
2020 senesi dekabrniñ 4-nde «Veciye Kaşka davasınıñ» 63 yaşında mabüsi Kazim Ametovnıñ evinde Rusiye quvetçileri tintüv keçirdi. İlk malümatqa köre, anda «tahqiqat tedbirleri» oldı. Qırımtatar milliy areketiniñ faali Nariman Celâl bildirgenine köre, FSB hadimleriniñ tintüvi Ametovnıñ oğlunen bağlı.
Ametov, evlerinde keçirilgen tintüv tafsilâtları aqqında tarif etti.
Qırım Muhtar Cumhuriyeti ve Aqyar prokuraturası ve Qırım Muhtar Cumhuriyetiniñ Milliy politsiyası cinaiy tahqiqat başlattı.
