Qırımtatar asıllı ukrain yırcısı Jamala martnıñ 24-nde Instagramda online çıqış yapacaq. Bu aqta o, içtimaiy ağdaki saifesinde yazdı.
Jamalanıñ bildirgenine köre, o, Chris Martin (Coldplay solisti) ve Robbie Williams kibi dünya yıldızlarından örnek almağa qarar berdi.
«Sabır eteyik, üç afta ve er şey keçer, eminim», – dep qoltuttı mühlislerine yırcı.
Ukrainada koronavirus telükesi sebebinden karantin kirsetildi. Soñki malümatqa köre, laboratoriyada tasdıqlanğan COVID-19 hastalarınıñ sayısı 26 insanğa arttı, üç kişi can berdi.
Qırımdaki Rospotrebnadzor idaresiniñ malümatına köre, martnıñ 19-na qadar monitoring devamında 1183 insan yañı koronavirus yuqunçı (COVID-19) talilinden keçti.
Qırım Sağlıq nazirliginiñ malümatına köre, işğal etilgen Qırımda 212 insan ekimlerniñ nezareti altında, 16 kişi izolâtorda buluna.
Koronavirus yuqunçı tarqaluvınıñ ögüni almaq içün işğal etilgen Qırımda ve Aqyarda «yüksek azırlıq» rejimi kirsetildi.
Qırımnıñ Rusiye yolbaşçısı Aksenovnıñ bildirgenine köre, Qırımda koronavirus hastaları qayd etilmedi.
