Kanada parlamenti qırımtatar sürgünligini genotsid olaraq tanılmasına dair qararğa rey berip olamadı. Bu aqta «Ukrinform» haber agentligi bildire.
Ukrain asıllı deputat Boris Vjesnevskiy qarar metnini rey berüvge çıqarmağa tırıştı, lâkin muhalifet buña qarşı narazılıq bildirdi ve spiker onı alıp taşlamağa mecbur oldı. Kanada parlamentiniñ qararnı qabul etmesi içün bütün azalarınıñ bir ağızdan rey bermesi kerek.
«1944 senesi mayısnıñ 18-nde sovet diktatorı İosif Stalinniñ 200 biñ tatarnı (qırımtatarını – QA) mülkinden marum qaldıraraq, ayvan vagonlarına mindirip ve 4 biñ km Orta Asiya çöllerine yollap, Qırımnı olardan temizlemek içün başlatqan qırımtatar sürgünligini parlamentke tanımağa teklif etem», – dep aytıla edi qarar metninde.
O, qabul etilse edi, er yıl mayısnıñ 18-nde Kanadada qırımtatar sürgünliginiñ qurbanlarını añma künü qayd etilecek edi.
Haber etilgenine köre, toplaşuv yekünlengende Boris Vjesnevskiy iyünniñ ortasında parlamentniñ şimdiki sessiyası bitmezden evel qararnı daa bir kere rey berüvge çıqarmaq içün elinden kelgenini yapmağa vade etti.
Sessiya salonında qırımtatar halqınıñ lideri Mustafa Cemilev ve Meclis reisiniñ muavini Ahtem Çiygoz bar ediler. Olar parlamentniñ tış işler komiteti azalarına işğal altındaki yarımadada insan aqları vaziyeti aqqında tarif etkenler.
Üç yıl evelsi Kanada parlamenti qırımtatar sürgünliginiñ genotsid olaraq tanılmasına ve bu cinayetniñ qurbanlarını añma kününiñ belgilenmesine dair qanun leyhasını endi baqqan edi. Vesiqa tek ekinci oquvda baqıldı, reylerniñ sayısı yeterli degil edi.
Mayısnıñ 9-nda qırımtatar sürgünliginiñ 75 yılına Latviya Seymi 1944 senesi mayısnıñ 18-nde olğan sürgünlikni ve yıllar devamında qırımtatarlarnıñ sürgünlik yerlerinde zornen tutulmasını halqnıñ genotsidi olaraq tanığan beyanatnı qabul etti.
