Latviya Seyminiñ Tış işler komiteti 1944 senesiniñ qırımtatar sürgünliginiñ genotsid olaraq tanılmasına dair beyanatnı qabul etip, Rusiyeniñ yarımada ilhaqını takbih etti. Bu aqta Ukrainanıñ Latviya elçihanesiniñ haberinde aytıla.
Latviya Seyminiñ Tış işler komitetiniñ reisi Rihards Kols işbu beyanat qırımtatar sürgünliginiñ 75 yılı arfesinde, mayısnıñ 16-nda, Seym toplaşuvına çıqarılacaq, dep bildirdi.
Ukraina elçihanesiniñ malümatına köre, Rigada Kronvald parkında Qırım yükeleri oturtıldı.
«Latviyanıñ dendrologlar cemiyeti Ukraina ve Rusiye istilâsından zarar körgen qırımtatar halqına birdemlik köstermek içün Qırım yükesini Latviyada yılnıñ teregi dep ilân etti», – dep aytıla haberde.
Mayısnıñ 18-nde Ukrainada ve dünyada 1944 senesi Qırımdan sürgün etilgen qırımtatarlarnı añalar. Şu künü qırımtatarlar tolu birinci eşelon yarımadadan Orta Asiyağa yollanğan edi. Umumen 180 biñ kişi sürgün etildi.
Ukraina Yuqarı Radasınıñ qararına köre, mayısnıñ 18-i Qırımtatar halqınıñ genotsid qurbanlarını añma künü olaraq ilân etildi.
