Qara qış ayınıñ 24-ne keçken gecesi Kıyivge Rusiye ücüm etkeninden sebep UNESCO Dünya mirası cedveline kirsetilgen "Kıyiv-Peçersk lavrası" Milliy qoruğınıñ obyektleri zarar kördi. Bunı gumanitar siyaseti boyunca baş nazir muavini, Ukrayina medeniyet naziri Tatyana Berejnaya bildirdi.
Lavra territoriyasında cenk areketleri sebebinden soñki viranlıq Ekinci cian cenki vaqtında qayd etilgen edi. Rusiye ücümi 66-ncı korpusını Uzaq qobalar kompleksiniñ kiriş qısmını bozdı. Aynı zamanda 67-nci Annozaçateyevskaya kilsesiniñ korpusı da zarar kördi. Qara qış ayınıñ 26-nda Facebookta Berejnaya yazğanına köre, mında fasad qısmen yoq etildi.
Onıñ aytqanına köre, anda qoruq ve milliy polis hadimleri çalıştı.
"Bugün tafsilâtlı tehnikiy teşkerüv keçirecekmiz ve tamir ve konservatsiyanı başlatacaqmız", — dep qoştı memur.
"Bu sene Lavra 975 yıllığını qayd ete. Ve şimdi anda Rusiye raketaları urula. Dünya bilmelidir: bu cenk tek Ukrayinağa qarşı degil. Bu, dünya medeniyetine qarşı cenk", — dep qayd etti o.
Ukrayina Medeniyet nazirliginiñ malümatına köre, Rusiyeniñ Ukrayinağa istilâsı başlağanından berli 1640 medeniy miras abidesi ve 2446 medeniy infrastruktura obyektleri yoq etildi.