Martnıñ 26-nda Kıyivde "Qırım işğali ve tirenüviniñ on yılı Qırım.Aqiqat jurnalistleriniñ fotoresimlerinde" fotoresim sergisi açıldı
Sergide Qırım.Aqiqat ve Azatlıq Radiosınıñ 2014 senesinden 2022 senesine qadar Qırımda çıqarılğan 26 fotoresimi taqdim etile – Anton Naumlük, Stanislav Yürçenko, Alina Smutko, Taras İbragimov, Aleksandra Surgan, Emine Ceparova, Ezaber Pinhas, Yevgen Juk, Anatoliy Krımskiy, Vladimir Pritulanıñ fotoresimleri ve Qırım.Aqiqatnen işbirlik yapqan "Qırım birdemligi" jurnalistleriniñ fotoresimleri.
Açılışta fotoresim sergisini ziyaret etken musafirler arasında – Ukrayina Yuqarı Radasınıñ söz serbestligi meseleleri komitetiniñ reisi Yaroslav Yürçişin, "Antitela" ukrayin muzıka gruppasınıñ lideri Taras Topolâ, Qırımtatar Milliy Meclisiniñ reisi Refat Çubarov, Qırımtatar Milliy Meclisiniñ reis muavini Ahtem Çiygoz, Ukrayina prezidentiniñ QMC-deki daimiy temsilcisi Tamila Taşeva, qırımlı faaller, uquq qoruyıcılar ve jurnalistler edi.
Qırım işğali ve tirenüviniñ on yılı Qırım.Aqiqat jurnalistleriniñ fotoresimlerinde (fotoresimler)
Martnıñ 25-nde Radio Free Europe/Radio Svoboda Qırım.Aqiqat Ukrayina hızmetiniñ leyhası 10 yılını qayd etti. O, 2014 senesi mart ayında – Qırım yarımadasınıñ Rusiye Federatsiyası tarafından işğaliniñ ve ilhaqınıñ ilk künleri ve aftalarında qurulğan edi. On yıl devamında Qırım.Aqiqat jurnalistleri, sıq-sıq azatlıqnı ve atta ayatını telükege oğratıp, Qırımda kerçekte ne olğanını, qırımlılar nasıl yaşağanını ve küreşkenini aytıp bere.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
