Mare (Maryanovka) köyü yanında yol qazası neticesinde yaralanğan beş insan Qurman merkeziy rayon hastahanesine alındı. Büyüklerniñ alı orta ağırlıq, bala ağır alda, dep bildire TASS Rusiye haber agentligi.
Qırımdaki Rusiye sağlıq nazirligi qazada yaralanğanlarnıñ alı aqqında şimdilik bir şey bildirmedi. Bu malümatnı tasdıqlaycaq diger menbalar yoq.
Qırımdaki Rusiye İç işler nazirliginiñ idaresi mikroavtobus Aqmescit tarafına kete edi, dep bildire, o, yoldan yuvarlanıp, terekke uruldı.
«Beş kişi yaralandı, şu cümleden doquz yaşında bala, insanlar çeşit derece yaralar aldı. Ağır alda olğanlar da bar», – dep bildirdi müessiseniñ matbuat hızmeti.
Qurman rayonında iyünniñ 23-nde Mercedes-Benz Sprinter mikroavtobusı yuvarlanıp ketti.
Qırımlı qurtarıcılarnıñ bildirgenine köre, Qırımda ciddiy yol qazalarınıñ sayısı arttı. Qırımda 2019 senesiniñ birinci üç ayında keçken yılğa baqqanda bir buçuq qat ziyade aydavcı mesüliyetke çekildi.
