Beş insan, şu cümleden bir bala, Qurman rayonında yüz bergen yol qazasında yaralandı. İyünniñ 23-nde Mercedes-Benz Sprinter mikroavtobusı yuvarlanıp ketti.
Qırımdaki Rusiye Fevqulâde vaziyetler nazirligi idaresiniñ matbuat hızmeti bildirgenine köre, yol qazası Mare (Maryanovka) burulışında oldı.
RİA «Novosti» Rusiye haber agentliginiñ politsiyanıñ matbuat hızmeti bergen malümatına esaslanıp bildirgenine köre, mikroavtobus «manialarnen çatıştı».
Tafsilâtlı malümat berilmey.
«Mercedes-Benz Sprinter maşinası Aqmescit tarafına ketip, manialarğa rastkeldi. Yol qazası neticesinde beş insan yaralandı, olar arasında çağına yetmegen birisi bar edi. Olar farqlı dereceli yaralar aldı», – dep aytıla haberde.
Qırımlı qurtarıcılarnıñ bildirgenine köre, Qırımda ciddiy yol qazalarınıñ sayısı arttı. Qırımda 2019 senesiniñ birinci üç ayında keçken yılğa baqqanda bir buçuq qat ziyade aydavcı mesüliyetke çekildi.
