O, delicesine eyecanlana ve duyğularını ne matbuat, ne de zalnı az qala toldurğan seyirciler ögünde gizlemey. Jamala fevralniñ 24-den soñ ilk defa Kıyivde kontsert programması ile çıqışta bulundı. Bundan evel qırımtatar asıllı ukrayin yırcısı Qırım.Aqiqatqa eksklüziv intervyüde Qırımğa barmaq niyetleri ve qırımlı dostları ile alâqası aqqında aytıp berdi.
Yañı "Poklık" mini albomınıñ tanıtılması oktâbrniñ 10-nda rusiye ateşinden zarar körgen Hanenko adına Milliy sanat müzeyinde olıp keçti. Müzey reberliginiñ aytqanldarına köre, atta Ekinci Dünya cenki yıllarında bina bu qadar zarar körmegen. Olar Jamalağa hayriye kontsert keçirip, arbiyler içün para toplağa teklif ettiler. Böylece, biletlerniñ satıluvından kelgen bütün para şimdi Herson civarında bulunğan 57-nci brigadağa berilecek. Jamala sanadan arbiylerniñ ihtiyacları içün para toplamasına qoşulmağa çağırdı.
Kontsertniñ başlamasına qadar bir qaç daqqa qala. Jamala memleketinde çıqış etmezden evel pek eyecanlanğanını ayta. Episi bu yırcınıñ icadiy teneffüsi olmamağana baqmadan. Rusiyeniñ Ukrayinağa qarşı büyük istilâsı başlağandan çoq keçmeden Jamala Avropa televizion kanallarınıñ yayınlarında yırlap, Ukrayina içün millionlarnen dollar toplamağa başladı.
Soñra Poloniya televizionında "Yıldızlarnen oyunlar" şousında iştirak edi. Maqsat aynı - memleketi içün para tlplamaq.
Bütün bu aylar devamında yolda. "Poklık" mini albomı böyle tarzda yazıldı.
Bir şey uçaqta, bir şey yolda yazılğanını hatırlayım
Jamala: "Poklık" ğaliba doğğan yeri olmağan ilk mini albomıdır. Çünki o, fevralniñ 24-den soñ (Rusiyeniñ Ukrayinağa) büyük istilâsı başlağandan soñ menim bulunğanım er yerde doğıp keldi. Men daima arekette edim, dünyanıñ 20-den çoq memleketinde oldım. Ve "Take me to a place", ya da "Zakohana", ya da "Sınu", ya da "Be brave, be different" türküleriniñ sözleri ne yerde doğğanını hatırlamam bile. Bir şey uçaqta, bir şey yolda yazılğanını hatırlayım".
"Bu evimni sağınğanım aqqındadır". Sekiz yıldan ziyade Jamala vatanı Qırımğa barmadı, şimdi ise balalarınıñ telükesizligi içün Ukrayina tışında yaşamaq mecburdır. Türkülerine ise evelki kibi teren manalar qoya.
Er bir türkümniñ büyük manası bar, o sadece keyf ve menim duyğularımnı köstermey, o bizlerni daa bir şeyge ögretmek kerek
Jamala: "Türkü aqqında, onıñ küçü aqqında pek müim bir şey. "1944" türküsi 2017 senesi ğalebe qazanğanından ğayrı daa ne qadar çoq yapıp oldı. Atta özümni bu türküden ayıram. Çünki o artıq menim ögbmdedir. O bugün aqqındadır: "When strangers are coming, They come to your house. They kill you all and say: We’re not guilty". "Poklık" albomı bütün elektron muzıkanıñ parçalarındaki yönelişlerden ibaret, atta dare qırımtatar aleti de qullanılğan. Soñra daa folklor bek-vlkal bar. Men folklor ukrayin tarzında yazdım. Er bir türkimniñ büyük manası bar, o sadece keyf ve menim duyğularımnı köstermey, o bizlerni daa bir şeyge ögretmek kerek. Böyle bir hususiyetim bar".
Qırımdaki dostlarınen aslında bağ tutmağanını dey. Olar oña yazmaylar. Sebepler ne olğanını tam olaraq bilmey, amma özü de tanışlarına yazmay, çünki onen qonuşacaqları olar içün telükeli ola bile.
Asla yazmaylar. İnanasızmı? Kimse yazmay
Jamala: "Asla yazmaylar. İnanasızmı? Kimse yazmay. Eki sebep bardır dep tüşünem: ya ja olar içün bu kerçekten telükeli ola bile, ya da olarnıñ fikri başqadır. Vesselâm. Tek bu eki variant aqlıma kele. EKisini de qabul etem. Tamam. Olar qorqsalar men de yazmayım. İşleri nasıl olğanını soramağa istesem de yazmayım."
Er alda Jamala iç birine darğın degil. Eñ qısqa zamanda evge ketmege azır. Diger siyasiy baqışlarınen olğan adamlarnen körüşmege de azır. Amma buña baqmadan, kimerde birisinen qavğalaşmamaq içün içün kendisini tutmaq mucbur ola eken.
Yanımda rusça laf etkenlerde, men ukrayince laf etip başlayım, añlasınlar dep
Jamala: "Seyaat etip türlü şeylerge rastkeldim. Misal olaraq, uçaqnen ketmek içün bilet satın alğanda, yanında kim oturacağını bilmeysiñ. Kimerde, "soñ, ne anda şu Ukrayina" kibi laflar eşitesiñ. Ve yanında oturğan kişçi dostuñ olmağanını birden añlaysıñ. Ve "Çervona kalına! türküsini, ya da biz ğalebeler elde etkenimiz aqqında haberlerni diñlep başlaysıñ. Soñra olar ağızların qapatalar. Men ise.. İçiñde öyle bir oğlan uyana ki, çağına yandırmaq isteysiñ. Soñra 6-7 saat devamında ketecegiñizni hatırlaysıñ ve tınçlanasıñ. Yanımda rusça laf etkenlerde, men ukrayince laf etip başlayım, añlasınlar dep".
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
