Link açıqlığı

Saatnıñ esas haberi

«İrandan keldi». Qırımda üç yañı koronavirus hastası qayd etildi


Qırımda üç yañı koronavirus hastası qayd etildi. Bu aqta Qırımnıñ Rusiye yolbaşçısı Sergey Aksenov koronavirus yuqunçınıñ tarqaluvına qarşı ştab toplaşuvında bildirdi.

«Eki hasta – daa evel qayd etilgen hastalarnen alâqada olğan qırımlılar. Üçünci hasta Qırım köprüne yaqınlaşqanda qırğınlıqqa qarşı tedbirler vaqtında regionğa kirgen şahıslarnıñ anketleştirilüvi neticesinde qayd etildi. İrandan keldi», – dep bildirdi Aksenov.

Onıñ malümatına köre, alâqada olğan insanlar belli, tibbiy közetüv yapıla, laborator tedqiqleri yapıla.

Al-azırda Qırımda 40 koronavirus hastası qayd etildi. 27-si – ketirildi, 13-ü yerli ola.

Aprelniñ 16-nda saba Qırımnıñ Aqmescit ve Aqşeyh rayonlarında üç yañı koronavirus hastası qayd etildi. Qırımda 37 koronavirus hastası bar.

Aprelniñ 16-nda Aqyarda dört yañı koronavirus hastası qayd etildi. Yılnıñ başından berli Aqyarda 12 hasta qayd etildi, dört kişi tüzelip hastahaneden çıqtı.

Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.

Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.

O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.

2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.

XS
SM
MD
LG